Les mots surlignés font l'objet d'une note
1Monsieur, par la lettres quil vous at pleu mescripre, j’ay sceu
2la prinse du Poussin par les habitans du lieu qui y ont
3introduict les huguenotz, qui nous fera ung peu mieulx
4pencer en nos affaires et veiller sur les catholiques qui
5nen feront pas moins tant soit peu quilz en ayent de moien.
6Lequel neaultmoins vous leur osterés, faisant dresser des
7forces pour les brider contenir en raison. Il vault beaulcop
8mieulx que le païs soustienne une despance pour quelque temps
9que destre atandant une entière ruyne et perte dicelluy.
10Je suis certain quilz suivront et en cela et en toutes aultres
11chose, votre bon conseil et commandemantz. De ma part, je ne
12vous puis offrir que mon bien et ma vie pour le service du roy,
13de ma patrie et plus pour le votre particullierement. Jay veu
14aussi qu’avés retenu les compagnies quenvoiés à monsieur le
15mareschal et icelles avés mandé à monsieur de Rosset avec
16votre compagnie pour soppozer, si tant est quilz voulsissent
17entreprandre atendant votre venue, laquelle encore quelle y
18feust necessaire, si est ce toutesfois que votre presance est plus que
19necessaire depardeça où ilz entreprendront plustost que en
20lieu de votre gouvernement si par votre saige prevoiance il
21ni est suffizamment proveu. Jenvoie expressemant le
22cappitaine Arnault pour scavoir votre partemant pour vous
23accompaigner et recepvoir vous commandemantz et aussi
24pour scavoir le deportemant des fames desquelles je me
25trove assés empesché pour voloir plustost appaiser les
26choses avec la doulceur qu’avec la forse, quest la cause
27que je ne suis encor vollu partir de ce lyeu que je ne sache
28comme j’ay à mi conduire car ung plus avisé que moy
29[195 v°] y seroit bien empeché. Je vous prie, monsieur, comme mon
30melleur seigneur et amy, me volloir conseiller car si elles
31perdent leur collère, il est dangereus que je ne preigne la
32miene et que je ne fasse chose dont elles et moy serons
33marriz tout le demeurant de noz vies, ce que je ne voldrey
34pour chose du monde et craignant vous estre ennuieulx
35en ces fascheus discours, je finirey ma lettre par mes
36très humbles recommandations à votre bonne grace. Je prie
37le Createur vous donner,
38monsieur, en perfaicte santé, très bonne et longue vie.
39De votre maison à la Motte, ce premier de mars 1573.
40Votre très humble et obeissant serviteur
41Lamote Verdeyer